E rapòrt akí ta mustra e problemanan ku kua mayornan soltereo i nan yunan ku ta biba den probresa na Hulanda karibense tin di aber kuné. Atrobe nan ta pidi atenshon i akshon di gobièrnu lokal i di rèino. Nationale ombudsman, Kinderombudsman i otro organisashonnan ya tin basta tempu ta pidi atenshon pa esaki. For di kòmbersashonnan ku e defensornan di pueblo i nan investigaornan tabatin ku mayornan soltero i nan yunan, atrobe a sali na kla ku ainda esaki ta nesesario. Anteriormente a hasi investigashon na pobresa bou di grandinan i adultonan hóben na Hulanda karibense.
Mihó koperashon
A pesar di e medidanan ku a tuma pa kombatí pobresa na Boneiru, Sint-Eustatius i Saba, Nationale ombudsman i Kinderombudsman ta keda preokupá pa ku mayornan hóben i nan yunan ku ta lanta den pobresa. Un koperashon urgente i intensivo entre Atministrashon Públiko i Entidatnan Públiko di e tres islanan ta nesesario. Den esaki e defensornan di pueblo enfátikamente ta mira un ròl di maneho pa ministerio di BZK. A resultá ku e maneho no ta simpel ya komo tin hopi ministerio i organisashonnan gubernamental involukrá. No opstante tin mester di un esfuerso struktural i duradero pa baha pobresa na Hulanda karibense.
Diferenshanan muchu grandi entre Hulanda europeo i karibense
E defensornan di pueblo ta haña ku mayornan soltero i nan yunan por fèrwagt di gobièrnu ku nan ta wòrdu yudá lihé i kuidadosamente pa drecha nan situashon. Nan mester por traha riba un futuro stabil pa nan mes i pa nan yunan. E diferenshanan den e fasilidatnan kompará ku Hulanda europeo ta muchu grandi i mester bin ku un mínimo sosial ku ta basá riba e kosto real di bida na e islanan. Por logra esaki únikamente pa medio di un mihó konosementu di e problemanan ku tin.
Ta masha importante ku mayornan soltero na Hulanda karibense no ta wòrdu yudá únikamente ku mas sèn. Nan i nan yunan tin derecho riba un mehora rápido di fasilidatnan. Por logra esei únikamente ku un mihó koperashon entre e diferente gobièrnunan i organisashonnan. Tantu na Hulanda karibense komo na Hulanda europeo.
Reinier van Zutphen, Nationale Ombudsman
Konsekuensianan pa e muchanan
Pobresa tin konsekuensianan grandi pa edukashon di mucha, sigur si nan mayornan ta soltero. Den kòmbersashonnan ku mayornan i muchanan, anto for di investigashonnan anterior, a sali na kla ku mayornan soltero tin ménos espasio pa duna nan yunan sufisiente kuido, amor i atenshon. E mayornan ta bou di preshon i nan ta di strès pa motibu di tur e problemanan (finansiero). Ademas nan ta pasa hopi tempu pafó di kas pa por traha. Esaki ta sòru ku tin ménos struktura, regla, apoyo i interes pa e muchanan.
Muchanan ku ta krese den probresa hopi biaha ta eksperiensiá un skala di problema riba diferente área di bida. Pa e motibu akí e riesgo ta grandi ku nan ta heredá e pobresa ku ta pasa di generashon pa generashon. Ta importante pa kibra e patronchi akí.
Margrite Kalverboer, Kinderombudsvrouw
Rekomendashonnan
A base di tur kòmbersashon i resultadonan, e defensornan di pueblo ta hasi e siguiente rekomendashonnan na sekretario di estado di BZK:
- Krea un enfoke integral di (akseso na) ayudo, ku atenshon spesífiko pa i un enfoke dirigí riba mucha.
- Empeñá mas pa asistensha finansiero (di debe) i fasilidatnan legal aksesibel.
- Hasi apoyo pa kriansa un tema habrí, disponibel i aksesibel.
- Ofresé òpvang pa mucha di akseso gratuito.
- Ofresé kursonan pagabel pa asina mayornan (soltero) por sigui siña.
Kontinuashon
Na novèmber 2022 lo organisá un koferensha na Hulanda karibense. E ora ei e defensornan di pueblo i nan koleganan di Kòrsou i Sint-Maarten lo sigui papia tokante e aserkamentu amplio di pobresa.
Motibu
For di 2010 Boneiru, Sint-Eustatius i Saba ta munisipionan spesial di Hulanda. Huntu nan ta forma Hulanda karibense. For di e tempu ei Nationale ombudsman ta trata kehonan tokante instanshanan gubernamental na e islanan. For di 2012 e tambe ta trata kehonan tokante instanshanan gubernamental lokal, esta entidatnan públiko. For di 2011 Kinderombudsman ta trata kehonan na Hulanda karibense.
Download rapòrt 'Muchanan karibense di e kuenta' (Papiamentu)
Download rapport 'Caribische kinderen van de rekening' (Nederlands)
Download report 'Caribbean children pay the price' (English)